रायपुर, 31 जुलाई 2023 सोमवार। मुख्यमंत्री दाऊ भूपेश बघेल कहीन कि ये खुशी के बात हे कि प्रदेश म युवा मन ल कौशल विकास के प्रशिक्षण देहे जावत हावय अउ सरलग युवा मन ल नौकरी तको मिलत हावय। आज जेन युवा मन ल नियुक्ति पत्र मिले हे उन मन ल शुभकामना देवत हाववं। ये सरगल चलइया प्रक्रिया हरे । जइसे जइसे युवा प्रशिक्षित होही, उन मन ल कौशल अनुरूप रोजगार ले जोड़े के बूता तको चलत रहिही। मुख्यमंत्री बेरोजगारी भत्ता के चौथइया किश्त के ऑनलाईन अंतरण कार्यक्रम ल सम्बोधित करत ये बात ल कहीन।
मुख्यमंत्री दाऊ भूपेश बघेल ह आज इहां अपन निवास कार्यालय म बेरोजगारी भत्ता योजना के तहत चौथइया किश्त के रूप म प्रदेश के 01 लाख 22 हजार 625 हितग्राही मन ल 31 करोड़ 71 लाख रूपिया के राशि सोज्झे सोझ उन्कर खाता म अंतरित करीन। बेरोजगारी भत्ता के अप्रैल, मई, जून अउ जुलाई महीना के चार किश्तों ल मिलाके हितग्राही मन के खाता म अब तक 112 करोड़ 43 लाख 30 हजार रूपिया के राशि कें भुगतान करे जा चुके हावय। आज अंतरित करे गे राशि म अप्रैल महीना के बाचत 147 लाभार्थी मन ल चार महीना अउ मई महीना के बाचत 373 लाभार्थी मन ल तीन महीन के अउ जून महीना के शेष 3028 लाभार्थी मन ल दू महीना के बेरोजगारी भत्ता जारी करे गिस। मुख्यमंत्री ह कार्यक्रम के बेरा चिन्हा स्वरूप बेरोजगारी भत्ता के प्रशिक्षित हितग्राही मन नौकरी के आमंत्रण पत्र तको प्रदान करीन।
मुख्यमंत्री दाऊ भूपेश बघेल ह कार्यक्रम ल सम्बोधित करत कहीन कि युवा मन ल रोजगार ले जोड़ना हमार प्राथमिकता हावय अउ एक बर हम सरलग उदी करत हावन। उन मन कहीन कि प्रदेश के 36 आईटीआई के आधुनिकीकरण बर 1188.36 करोड़ परियोजना बर एमओयू तको करे गे हावय। जेकर ले युवा मन ल 06 ठिन नवा तकनीकी ट्रेड के संग 23 कमती बेरा के कोर्स म प्रशिक्षण दिये जाही। एकर ले लगभग हरेक बछर 10 हजार युवा मन ल प्रशिक्षण दिये जाही। इन युवा मन ल अबड़ अकन उद्योग मन म नियोजित कराये जाही। युवा मन ल अपन विकास के रद्दा म आर्थिक परेशानी मन के सामना झन करे बर परय, एकर बर हमन बेरोजगारी भत्ता देहे अउ पीएससी व व्यापम के प्रतियोगी परीक्षा मन म शुल्क माफ करके उन मन ल बड़का राहत के बूता करही।
मुख्यमंत्री दाऊ भूपेश बघेल ह आगू कहीन कि पहिली गरीब अउ निम्न मध्यम वर्गीय युवा मन इही सोच म म कई ठिन परीक्षा के फार्म नइ भर पावत रिहिस हे कि आवेदन करे बर शुल्क देहे बर परही। फेर अब उन्कर ये चिन्ता तको दुरिहा गे। मुख्यमंत्री ह कहीन कि हमन देश के युवा मन ले सोज्झे संवाद करे के शुरूआत करे हन। प्रदेश के प्रगति अउ विकास खातिर युवा मन के संग जरूरी हावय।
युवा मन अपन प्रदेश ल आगू बढ़ाए खातिर का सोच रखथे ये पहल ले उन्कर विचार ल जाने के मौका मिलत हावय। मुख्यमंत्री दाऊ भूपेश बघेल ह कार्यक्रम ल सम्बोधित करत कहीन कि युवा मन ल जादा ले जादा रोजगार उपलब्ध कराए के उद्देश्य ले 41 हजार शासकीय पद मन म भर्ती चलत हावय। हमन युवा मन ले जऊन बात कहे रहेन ओला पूरा करे हावन। भर्ती मन ऊपर लगे रोक के हटते ही हमन सरकारी नौकरी बर विज्ञापन निकाल दिए हन। येकर संगे संग युवा मन ल रोजगार अउ स्व-रोजगार बर तियार करे के उद्देश्य ले कौशल विकास के प्रशिक्षण तको देहे जावत हावय। प्रशिक्षित युवा मन ल रोजगार ले जोड़े बूता तको संगे संग चलत हावय। उन कहीन कि पीछु सरकार ह 13-14 बछर म 98 करोड़ रूपिया बेरोजगारी भत्ता के रूप में बांटे रिहिसे। हमन चारेच् महीना म 112 करोड़ ले अधिक के राशि बेरोजगारी भत्ता के रूप म वितरित करे हावन।