युवा मन ले मिलके युवा मन के बात, संभागस्तरीय सम्मेलन मन म मुख्यमंत्री करहीं गोठ-बात
युवा मन के रचनात्मक ऊर्जा अऊ छत्तीसगढ़ ल लेके ऊंखर सपना ल जाने मुख्यमंत्री करेहीं संभाग स्तरीय गोठ-बात
रायपुर, 11 जुलाई 2023/ मुख्यमंत्री श्री भूपेश बघेल ह पाछू दिनन म आम जनता ले भेंट-मुलाकात म सबो वर्ग ले गोठबात करे रहिन अऊ प्रदेश के विकास ल लेके बहुत अकन पहल ये कार्यक्रम के समय म करे गए रहिस। इही तर्ज म युवा आकांक्षा मन ल जाने मुख्यमंत्री अब युवा मन ले सीधा गोठ-बात करहीं। ये कार्यक्रम संभाग स्तरीय होही। कार्यक्रम म युवा छत्तीसगढ़ के विकास ल लेके अपन समझ साझा कर सकहीं।
सवाल पूछहीं युवा, मुख्यमंत्री देही जवाब-
छत्तीसगढ़ म राजीव युवा मितान क्लब के गठन के बाद युवा ऊर्जा ल सकारात्मक दिशा मिले हे। ए क्लब मन के माध्यम ले युवा अपन क्षेत्र मन म रचनात्मक काम करत हें अऊ एमां काफी उत्साह हे। अइसन म संभागस्तरीय होवइया अइसन आयोजन म युवा अपन अनुभव घलोक साझा करहीं, ताकि ऊंखर अनुभव के लाभ आन मनखे घलोक उठा सकयं अऊ प्रदेश स्तर म एला कार्यान्वित करे के पहल घलोक करे जा सकय। ये कार्यक्रम म मुख्यमंत्री अपन बात रखहीं अऊ युवा घलोक अपन बात साझा करहीं। फेर युवा मुख्यमंत्री ले अपन सवाल घलोक पूछ सकहीं। कार्यक्रम म सबो वर्ग के युवा मन के प्रतिनिधित्व होही।
तीन सबले अच्छा सवाल पूछइया युवा मन ल देहे जाही स्मार्ट फोन-
ये कार्यक्रम म कई ठन विभाग के सचिव मन घलोक संघरहीं। जेन युवा मन के सवाल के सरोकार इंकर विभाग मन ले होही, ऊंखर उत्तर सचिव देहीं। कार्यक्रम म सामिल होए के इच्छुक युवा मन ल पोर्टल म अपन रजिस्ट्रेशन कराना होही, जेखर कड़ी साझा करे जाही। कार्यक्रम म सामिल होवइया युवा मन के चयन लाटरी के माध्यम ले करे जाही। सार्थक परिचर्चा ल प्रोत्साहित करे खातिर सर्वश्रेष्ठ सवाल पूछइया तीन युवा मन ल स्मार्ट फोन प्रदान करे जाही। खास बात ये हे कि कार्यक्रम म हिस्सा लेवइया सबो युवा मन ल प्रेरणादायक पुस्तक प्रदान करे जाही। कार्यक्रम के माध्यम ले युवा मन ल स्वतंत्रता संग्राम के बारे म घलोक जागरूक करे के कोसिस करे जाही अऊ महात्मा गांधी के पुस्तक सत्य के मोर परयोग जइसे पुस्तक ले परिचित कराए जाही।
31 जुलाई तक भरे जा सकही रजिस्ट्रेशन फार्म-
ए खातिर आवेदन 31 जुलाई तक करे जा सकही। 10 अगस्त तक लाटरी के माध्यम ले युवा मन के सूची तियार कर लेहे जाही। जेन युवा मन के चयन लाटरी ले होही, ओ मन ल प्रशासन कोति ले कार्यक्रम स्थल तक लाय के व्यवस्था कराए जाही। जानबा हे कि मुख्यमंत्री श्री भूपेश बघेल ह साढ़े चार साल म युवा हित म बहुत अकन निर्णय लेहे हें जेखर से युवा मन के बेहतर भविष्य के प्रति उंखर सरोकार सरलग झलकत हे। प्रतियोगी परीक्षा मन के फीस माफी के संगेच रोजगार मिशन के पहल ले बड़ संख्या म शासकीय सेवा मन म नियुक्ति सुरू करे अऊ रोजगार मेला के आयोजन ले बड़ संख्या म रोजगार प्रदेश के युवा मन ल मिले हे। एक लाख 17 हजार ले जादा युवा मन ल बेरोजगारी भत्ता के राशि हर महीना देहे जात हे। अब तक 80 करोड़ रुपिया के राशि युवा मन के खाता म अंतरित होए हे।
