मुख्यमंत्री के जीरो टोलरेंस नीति के तहत बड़का कार्रवाई

स्वास्थ्य विभाग के सप्लायर इहां राज्य जीएसटी विभाग के छापेमारी, 48 करोड़ के सप्लाई म 1 करोड़ के जीएसटी चोरी के खुलासा
रायपुर, मुख्यमंत्री श्री विष्णु देव साय के भ्रष्टाचार के विरुद्ध जीरो टोलरेंस के नीति अऊ सरकारी खरीद म पारदर्शिता ठउका करे के प्रतिबद्धता के तहत राज्य जीएसटी विभाग ह रायगढ़ स्थित मेसर्स श्याम सर्जिकल उपर कार्यवाही करे हे। ये फर्म छत्तीसगढ़ संग झारखंड अऊ ओडिशा म घलोक सरकारी अस्पताल मन ल सर्जिकल अऊ मेडिकल उपकरण मन के आपूर्ति करथे।
राज्य जीएसटी विभाग के जांच म आगू आए हे के ये व्यवसायी ह स्वास्थ्य विभाग म पाछू 4–5 बछर म लगभग 48 करोड़ रूपिया के आपूर्ति करे हे, जबकि सही खरीदी केवल 10 करोड़ रूपिया के रहिस। प्रारंभिक जांच म ये घलोक स्पष्ट होय हे के व्यवसायी ह खरीदी मूल्य ले 4–5 गुना जादा कीमत म सामान के आपूर्ति करके 400 ले 500 प्रतिशत तक लाभ कमाए हे। ए लाभ ल लुकाय अऊ जीएसटी देनदारी ले बचे बर व्यवसायी ह अपन परिवारजन मन के नाव म तीन आन फर्म – राहुल इंटरप्राइजेज, नारायणी हेल्थकेयर, अऊ पी.आर. इंटरप्राइजेस बनाईस अऊ आपस म ही खरीदी बिक्री दिखाके करीब 1 करोड़ रूपिया के जीएसटी चोरी करिस।
ए मामला म मुख्यमंत्री श्री विष्णु देव साय के स्पष्ट निर्देश के मुताबिक वित्त मंत्री श्री ओ. पी. चौधरी ह अधिकारी मन ल सरकारी आपूर्ति म विशेष नजर रखे अऊ कोनो प्रकार के अनियमितता ल तुरंते पकड़े के हुकुम जारी करे रहिन। एकरे तहत राज्य जीएसटी विभाग के टीम ह ये वाले प्रभावी कार्रवाई करे हे।
मुख्यमंत्री श्री साय ह कहिन हे के राज्य सरकार सरकारी निधि अऊ जन स्वास्थ्य ले जुड़े सेवा म कोनो प्रकार के भ्रष्टाचार ल बर्दाश्त नइ करय। ए प्रकार के धोखाधड़ी न केवल आर्थिक अपराध हे, बल्कि जनहित के संग विश्वासघात घलोक हे।
प्रदेश सरकार ह अइसन सबो आपूर्तिकर्ता अऊ ठेकेदार मन ल चेतावनी देहे हे के कहूं कोनो मनखे या संस्था सरकारी व्यवस्था के दुरुपयोग करके अनुचित लाभ अर्जित करे के प्रयास करही, त ओखर विरुद्ध सख्त ले सख्त कार्रवाई करे जाही।
ये वाले कार्रवाई राज्य शासन के ईमानदार, पारदर्शी अऊ जनहितकारी प्रशासनिक दृष्टिकोण के उदाहरण हे, जेखर से ये स्पष्ट होथे के मुख्यमंत्री श्री साय के अगुवई म छत्तीसगढ़ सरकार भ्रष्टाचार के विरुद्ध पूरा प्रतिबद्धता अऊ सख्ती के संग काम करत हे।