अपराध, नशाखोरी अऊ अवैध गतिविधि मन म हमर सरकार के जीरो टॉलरेंस के नीति: मुख्यमंत्री श्री विष्णु देव साय

रायपुर, 10 फरवरी 2024। मुख्यमंत्री श्री विष्णु देव साय ह कहिन कि अपराध, नशाखोरी अऊ अवैध गतिविधि मन म हमर सरकार के जीरो टॉलरेंस के नीति हे। कहूं अपराध म लगाम नइ लगही त सबंधित जिला के पुलिस कप्तान उपर कड़ा विभागीय कार्रवाई करे जाही। मुख्यमंत्री ह पुलिस मुख्यालय नवा रायपुर म आज आयोजित पुलिस महानिरीक्षक अऊ पुलिस अधीक्षक मन के सम्मेलन ल संबोधित करते ये कड़ा निर्देश दीन। उमन कहिन कि पुलिस ल लेके अपराधी मन के मन म डर अऊ आम जनता के मन म सेना के जइसे सम्मान होना चाही।
मुख्यमंत्री श्री विष्णु देव ह अधिकारी मन ले कहिन कि पुलिस के व्यवहार अपराधी मन बर कठोर होवय अऊ आमजन बर वोतकेच नरम अऊ मीठ होना चाही। उमन कहिन कि अवैध शराब, जुआ, सट्टा जइसे सामाजिक बुराई समाज ल अंदर तक खोखला कर देथे। जब युवा एखर से प्रभावित होत हे तो ये सबले जादा चिंता के बात हे। मुख्यमंत्री ह अधिकारी मन ल कड़ा निर्देश देवत कहिन कि कहूं आपराधिक गतिविधी मन उपर लगाम नइ लगही तो ना केवल संबंधित जिला के पुलिस कप्तान भलुक थाना स्तर के पुलिस अधिकारी मन उपर घलोक कार्रवाई करे जाही।
श्री साय ह कहिन कि पुलिस विभाग अनुशासित विभाग हे, पुलिस अधिकारी मन म ये अनुशासन दिखना चाही, जऊन अंततः अनुशासित अऊ अपराध मुक्‍त समाज के स्थापना म मील के पत्थर साबित होही। उमन प्रधानमंत्री श्री नरेंद्र मोदी के दंड ले न्याय के तरफ के संकल्पना ल स्थापित करे बर करे जात प्रयास के जिक्र करत कहिन कि नवा कानून समयबद्ध तरीका ले लागू होही, ये ठउका करे जाए।