छत्तीसगढ़ी व्यंजन मन के गिफ्ट पैक ’जोरन’ होइस लांच

रायपुर, मुख्यमंत्री श्री भूपेश बघेल ह आज राज्य स्थापना दिवस के अवसर म महिला स्वसहायता समूह मन कोति ले तियार करे छत्तीसगढ़ के पारम्परिक व्यंजन के स्मॉर्ट फूड वर्जन ’जोरन’ के गिफ्ट पैक लॉच करिन। व्यंजन के ये पैक म बाजरा के बर्फी, दरभा कॉफी, रागी के कुकीज़, बाजरा अऊ बस्तर काजू के कुकीज, मिलेट ले बने पीड़िया, पपची, ठेठरी आदि सामिल हे।
नगरीय प्रशासन विभाग के सचिव श्रीमती अलरमेलमंगई डी ह ये बेरा म जोरन गिफ्ट पैक के संबंध म बताइस कि छत्तीसगढ़ म बेटी ल बिहाव के समय उपहार स्वरूप झांपी म रखके व्यंजन देहे के परम्परा हे, जेखर नाम म ये गिफ्ट पैक के नामकरण ’जोरन’ करे गए हे। उमन बताइस कि शहरी आजीविका मिशन के अंतर्गत रायपुर म कार्यरत महिला स्व सहायता समूह मन कोति ले छत्तीसगढ़ के पारंपरिक व्यंजन के स्मार्ट फूड वर्ज़न ’जोरन’ गिफ्ट पैक तियार करे गए हे, जेमां स्व सहायता समूह मन कोति ले मिलेट, गौठान मन म तियार करिस गे शुद्ध घी, गुड़, बस्तर कॉफी, दरभा काजू आदि ले तियार व्यंजन मन ल सामिल करे गए हे। तिहार के मौका म मनखे एक-दूसर ल उपहार देहे बर ये गिफ्ट पैक के उपयोग कर सकही। उमन बताइन कि मिलेट मिशन के एकीकृत मॉडल के रूप म वैल्यू चेन अऊ मार्केट घलोक विकसित करे जात हे । एखर बर बाजार म बनेच ब्रांडिंग के संग जोरन उत्पाद के अमेजॉन आदि प्लेटफार्म म उपलब्धता के प्रयास करे जात हे। उमन बताइस कि वैज्ञानिक मन कोति ले मिलेट ले बने उत्पाद ल पौष्टिक अऊ स्मार्ट फूड के संज्ञा देहे गए हे।