सर्व आदिवासी समाज कोति ले मुख्यमंत्री के सम्मान
रायपुर, छत्तीसगढ़ विधानसभा के सेन्ट्रल हॉल म आज सर्व आदिवासी समाज कोति ले मुख्यमंत्री श्री भूपेश बघेल के आदिवासी समाज के हित म लेहे गए निर्णय अऊ कल्याणकारी काम मन बर उंखर पुष्प हार पहिरा के सम्मान करे गीस।
ये बेरा म स्कूल शिक्षा मंत्री डॉ. प्रेमसाय सिंह टेकाम, नगरीय विकास मंत्री डॉ. शिवकुमार डहरिया, उद्योग मंत्री श्री कवासी लखमा, खाद्य मंत्री श्री अमरजीत भगत अऊ विधायक श्री मोहन मरकाम विशेष रूप ले उपस्थित रहिन। अइसनहे विधायकगण सर्वश्री विक्रम मंडावी, चंदन कश्यप, लखेश्वर बघेल, लालजीत सिंह राठिया, डॉ. लक्ष्मी ध्रुव, बृहस्पति सिंह, चक्रधर सिंह सिदार, यूडी मिंज, विनय कुमार भगत संग बहुत अकन विधायक अऊ सर्व आदिवासी समाज के पदाधिकारीगण उपस्थित रहिन।
मुख्यमंत्री श्री बघेल ह ए बेरा म कहिन कि प्रदेश के आदिवासी बहुल क्षेत्र म कुपोषण के चुनौती ले निपटे, चिकित्सा अऊ रोजगार के बनेच व्यवस्था करे के उदीम सरलग करे जात हे। लोक निर्माण विभाग के माध्यम ले संचालित निर्माण कार्य मन म घलोक स्थानीय युवा मन ल रोजगार देहे के उदीम हे। ए क्षेत्र मन म छोटे वनोपज म आधारित छोटे उद्योग मन अऊ प्रसंस्करण इकाई मन ल प्रोत्साहित करे जाही, जेखर से इहां के नागरिक मन ल रोजगार अऊ आय अर्जन के अवसर मिल ससय। उमन बताइस कि ए क्षेत्र मन म छोटे वनोपज उपर आधारित प्रसंस्करण इकाई मन के स्थापना बर प्रधानमंत्री ले वन अधिनियम के प्रावधान मन ल शिथिल करे के आग्रह करे गए हे, जेखर से इहां रोजगारमूलक इकाई मन बर जमीन आवंटित करे अऊ संचालित करे बर सुविधा मिलही।
मुख्यमंत्री ह कहिन कि डीएमएफ के राशि के उपयोग खदान प्रभावित क्षेत्र म मनखे मन के जीवन म बनेच बदलाव लाय बर करे जाही। उमन बताइस कि आदिवासी क्षेत्र मन म कुपोषण दूर करे बर चना दे जावत हे, गुड़ घलोक देबोन। दन्तेवाड़ा जिला म कुपोषण दूर करे बर लइका मन अऊ महिला मन ल अण्डा वितरण के काम चालू करे गए हे जेला नीति आयोग ह सहराइन हे। उमन कहिन कि बस्तर अऊ सरगुजा म सिंचाई के प्रतिशत बिक्कट कम हे। नरवा, गरूवा, घुरवा, बाड़ी योजना के माध्यम ले इहां के नाला मन ल रिचार्ज करे के काम करे जाही, जेखर से सतही जल अऊ भूमिगत जल के उपलब्धता बाढ़ही। मुख्यमंत्री ह बताइस कि आदिवासी क्षेत्र विकास प्राधिकरण मन के अध्यक्ष स्थानीय विधायक मन ल बनाए के फैसला ले गए हे। अइसनहे तेंदूपत्ता संग्रहण के दर ढाई हजार रूपिया ले बढ़ाके चार हजार रूपिया प्रति मानक बोरा करे गए हे। बस्तर म प्रस्तावित स्टील प्लांट नइ बने म लोहंड़ीगुड़ा क्षेत्र के किसान मन के अधिगृहित जमीन लहुटाने के निर्णय घलोक करे गए हे।
