मोखला गोठान के अवलोकन करके रोपिस फलदार पौधा
रायपुर, केन्द्रीय संयुक्त सचिव अऊ नीति आयोग के अंतर्गत योजना मन के क्रियान्वयन बर नियुक्त करे गए जिला के प्रभारी सचिव डॉ. अमित सहाय ह छत्तीसगढ़ सरकार के विशेष प्राथमिकता वाले नरवा, गरवा, घुरवा अऊ बाड़ी योजना के मुक्तकंठ ले सराहना करे हे। उमन ये योजना ल ग्रामीण अर्थव्यवस्था ल अऊ जादा सशक्त बनाके किसान मन के आय म वृद्धि करइया बतात एला बहुत महत्वाकांक्षी योजना बताइए हें।
डॉ. सहाय ह आज ल राजनांदगांव जिला के अपन प्रवास के समय राजनांदगांव विकासखंड के ग्राम मोखला के आदर्श गोठान के अवलोकन करके इहां के व्यवस्था मन ल सराहिन। केन्द्रीय संयुक्त सचिव डॉ. सहाय ह मौका म उपस्थित अधिकारी मन ले मोखला म निर्मित ये गोठान के कुल क्षेत्रफल अऊ गांव के मवेशी मन के कुल संख्या अऊ ये गोठान म रोजेच अवइया मवेशी मन के संख्या के संबंध म घलोक जानकारी लीन।
अधिकारी मन ह बताइन कि मोखला के आदर्श गोठान कुल 7 एकड़ म फैले हे। गांव के कुल मवेशी मन के संख्या 690 हे, जेमां ले करीबन 400 के आस-पास के संख्या म मवेशी रोजेच ये गोठान म आत हे। डॉ. सहाय ह गोठान के संचालन व्यवस्था के संबंध म जानकारी लेत एखर सफल संचालन बर जनभागीदारी ल बहुत जरूरी बताइन। उमन मौका म उपस्थित गांव वाले मन ले घलोक गोठान के संचालन व्यवस्था अऊ एखर लाभ के संबंध म जानकारी लीन। गांव वाले मन ह गोठान के अलावा नरवा, गरवा, घुरवा अऊ बाड़ी योजना ल बहुत अकन दृष्टि ले बहुपयोगी बताइन। गांव वाले मन ह ये गोठान बर पैरा दान करे के घलोक जानकारी दीन। डॉ. सहाय ह गोठान म निर्मित चारागाह के घलोक अवलोकन करिन। मौका म उपस्थित अधिकारी मन ह ये चारागाह म नेपियर घास अऊ मोरिंगा आदि घास लगाय के जानकारी दीन। केन्द्रीय सचिव ह गांव वाले मन ले जनभागीदारी ले ये आदर्श गोठान के सफल संचालन करे के सलाह घलोक दीन।
ये दौरान डॉ. सहाय ह ग्राम मोखला म निर्मित प्रधानमंत्री ग्रामीण गृह योजनान्तर्गत निर्मित आवास मन के घलोक निरीक्षण करिन। उमन हितग्राही मन ले चर्चा करके व्यवस्था मन के संबंध म जानकारी लीन। केन्द्रीय संयुक्त सचिव डॉ. सहाय तीर के गांव सुरगी म श्री घनश्याम निषाद के निवास म पहुंच के कड़कनाथ मुर्गी पालन के व्यवसाय के जायजा लीन। उमन श्री घनश्याम निषाद ले कड़कनाथ पालन ले प्रतिमाह होवइया आमदनी अऊ कड़कनाथ कुकरी मन के रख-रखाव अऊ इंकर बीमारी मन के रोकथाम के उपाय के संबंध म घलोक जानकारी लीन।
