रायपुर, मुख्यमंत्री श्री भूपेश बघेल ले आज बिहनिया इहां ऊंखर निवास म आंध्रप्रदेश के विशाखापट्टनम स्थित एक निजी स्कूल म अध्ययन करत छत्तीसगढ़ के पढ़ईया लईका मन ह सौजन्य मुलाकात करिन। पढ़ईया लईका मन ह मुख्यमंत्री ल बताइन कि ओ मन एम्बुलेंस ल रद्दा दे बर चलाए जात जन जागरूकता अभियान ’गिव वे टू एम्बुलेंस’ले जुड़े हें। जागरूकता अभियान के सिलसिला म ओ मन छत्तीसगढ़ के भ्रमण म आए हें। इहां घलोक ओ मन मनखे मन ले मिलके एम्बुलेंस ल रद्दा देहे के अपील करहीं। मुख्यमंत्री ह लइका मन ल ये अभियान के सफलता बर शुभकामना देवत उंखर सराहना करिन।
पढ़ईया लईका मन ह मुख्यमंत्री ल बताइन कि एखर ले पहिली वो मन ह आंध्रप्रदेश अऊ ओड़िशा म घलोक ये अभियान के अंतर्गत मनखे मन ले मुलाकात करे रहिन। अब तक ओ मन करीबन 12 हजार मनखे मन ले मिले हें। लइका मन ह मुख्यमंत्री ल उंखर एक फोटू स्मृति चिन्ह के रूप म भेंट करिन। ये बेरा म स्कूल के डायरेक्टर श्री नलीनकांत श्रीवास्तव घलोक उपस्थित रहिन। छत्तीसगढ़ के ये लइका विशाखापट्टनम के ओकरिज इंटरनेशनल स्कूल म अध्ययनरत हें।
