नारायणपुर: महतारी वंदन योजना के राशि ले रजनी गढ़ही अपन लइका मन के उज्जवल भविष्य

नारायणपुर, 07 मार्च 2024। महिला सशक्तिकरण के दिशा म महतारी वंदन योजना एक बेहतर योजना हे। ए योजना के लाभ मिले ले महिला मन आर्थिक रूप ले मजबूत अउ आत्मनिर्भर बनहीं। वो मन खुद के अऊ अपन परिवार के छोट-मोट जरूरत बर अब दूसर मन के भरोसे नइ रहय। ए योजना ल लेके पूरा प्रदेश म भारी उत्साह के माहौल हे। छत्तीसगढ़ के विष्णुदेव सरकार 07 मार्च के योजना के पहली किस्त प्रदेश के महतारी मन के खाता म डीबीटी के माध्यम ले भुगतान करही। महिला मन ह पहिली ले ही सोच डरे हें के पइसा के उपयोग कइसे करहीं।
नारायणपुर जिला के पुसवाल गांव के रहवईया 35 बछर के रजनी कचलाम ह बताइस के वोखर दू बेटा अविनाश अऊ मानस हे। वो योजना के तहत् मिलइया पइसा के उपयोग अपन लइका मन के पढ़ाई-लिखाई अऊ ऊंखर स्वास्थ्य बर करही। वो ह बताइस कि आर्थिक स्थिति ठीक नइ होए के सेती 8वीं कक्षा के बाद वो अपन पढ़ाई छोड़ देहे रहिस। हर माता पिता के सपना होथे के वो अपन लइका मन के भविष्य बढि़या बनावय। वोकर कहना हे के ये योजना मोर बर वरदान बनके आए हे, अब ए योजना ले वोखर अंदर अपन लइका मन के भविष्य बर नवा आस जागे हे। वो ह मिलइया राशि ले अपन लइका ल आगू के पढ़ाई सरलग करा के ओखर भविष्य बनाए म अउ ऊंखर सपना पूरा करे म उपयोग करही। वो ह एहू बताइस कि ओखर छोटे बेटा मानस 2 साल 6 माह के हे ते ह मध्यम गंभीर कुपोषित श्रेणी म हे, अब योजना के तहत् मिलइया राशि के माध्यम ले वो मानस ल पौष्टिक आहार खवा के ओखर स्वास्थ्य म सुधार लाही। वो ह महतारी वंदन योजना ल कल्याणकारी बतात ए योजना बर मुख्यमंत्री श्री विष्णु देव साय ल धन्यवाद देहे।