पर्यटन मंत्री श्री ताम्रध्वज साहू ह दीन अधिकारी मन ल निर्देश
छत्तीसगढ़ पर्यटन मंडल के कार्यालय के घलोक करिस निरीक्षण
रायपुर, छत्तीसगढ़ के पर्यटन मंत्री श्री ताम्रध्वज साहू ह पर्यटन स्थल मन म सैलानी मन बर सुविधा विकसित करे के काम म तेजी लाय के निर्देश दीए हें। उमन पर्यटन ल बढ़ावा देहे अऊ पर्यटक मन ल आकर्षित करे बर प्रदेश के सबो प्रमुख पर्यटन स्थल मन ल सर्वसुविधायुक्त बनाए म जोर दीन। श्री साहू ह आज उद्योग भवन स्थित छत्तीसगढ़ पर्यटन मंडल के कार्यालय के निरीक्षण करिन। उमन ए दौरान मंडल के प्रबंध संचालक श्री एम.टी. नंदी ले विभागीय काम मन के जानकारी लीन। उमन अधिकारी मन ले पर्यटन विकास के योजना मन उपर घलोक चर्चा करिन।
पर्यटन मंत्री श्री ताम्रध्वज साहू ह अधिकारी मन ले कहिन के पर्यटन विभाग ल अऊ जादा तेज अऊ सक्रिय होए के जरूरत हे। छत्तीसगढ़ म प्रकृति प्रदत्त बहुत अकन सुंदर स्थान हे। इहां पुरातात्विक, ऐतिहासिक अऊ धार्मिक महत्व के घलोक कई स्थान हे। प्रदेश म पर्यटन के बहुत संभावना हे। उमन पर्यटन स्थल मन म सबो बुनियादी सुविधा मुहैया कराए डीपीआर तियार करके जल्दी काम शुरू करे ल कहिन। पर्यटन ल बढ़ावा देहे बर लउहे व्यापक कार्ययोजना तैयार करे जाही।
ए मौका म पर्यटन मंत्री कोति ले निर्देश देहे गीस के पर्यटन मंडल ह पत्राचार बर उपयोग म लाये जाने वाले लिफाफा मन म छत्तीसगढ़ के पर्यटन स्थल मन के फोटू छोटे आकार म छपाना चाही ताकि ओखर प्रसार-प्रचार हो सकय अउ एकर से जादा खरचा तको नइ होही। प्लानिंग सेक्शन म घलोक मंत्री जी कोति ले विकास बर भविष्य म होवइया निर्माण काम मन के विसय म विस्तृत जानकारी लेहे गीस। पर्यटन मंत्री कोति ले माना-तूता म स्थित 100 एकड़ ज़मीन म पी.पी.पी मॉडल ले एम्यूज़मेंट पार्क के निर्माण बर कार्ययोजना तैयार करे के निर्देश देहे गीस।
पर्यटन मंत्री कोति ले छतीसगढ़ पर्यटन मंडल ल देहे गे माई निर्देश ये प्रकार ले हे:-
1. एग्रीकल्चर कॉलेज तीर के 5 एकड़ के ज़मीन म पर्यटन मंडल बर कम्पोजिट बिल्डिंग बनाए बर प्रारूप तैयार करे ल कहिन।
2. पर्यटन मंडल के पूरा सेटअप ल नवा तरीका ले फेर से बनाए जाय, काम के हिसाब ले कर्मचारी मन के नियुक्ति म विशेष निर्देश देहे गीस।
३. पी.पी.पी. मॉडल के मुताबिक बाचे 9 मॉडल {13 म 4 के संचालन निजी क्षत्र कोति ले करे जात हे } के संचालन बर टेंडर अउ उंखर शर्त जारी कर, जरूरी रूप ले टेंडर के शर्त ले ओ मन ल अवगत कराये जाय के निर्देश दीन।
4. पर्यटन स्थल मन के निर्माण काम ल अंतर्राष्ट्रीय स्तर के लइक करे के सख्त निर्देश पर्यटन मंत्री ह दीन, उंखर कहना रहिस के येखर से विदेशी पर्यटक मन के संख्या म बढ़ोतरी हो सकही।
5. मंडल कार्यालय म अधिकारी मन ल स्पष्ट निर्देश दीन के वो मन अपन काम पूरा कर्तव्यनिष्ठा ले करयं अऊ अइसन नइ करे म ऊंखर विरुद्ध कार्यवाही करे जाना सुनिश्चित हे। कहूं डायरेक्टर के कोति ले उखंर उपर कार्यवाही नइ होही त पर्यटन मंत्री खुदे ऊंखर विरुद्ध कड़क कार्यवाही करहीं। ए सबके संग पर्यटन मंडल के समीक्षा बर मंत्री कार्यालय से एक अधिकारी के नियुक्ति घलोक करे जाही जऊन सबो काम मन के निरीक्षण करही अऊ डायरेक्टर महोदय के संग काम के जघा मन के दौरा घलोक करही।
