रायपुर, मुख्यमंत्री श्री भूपेश बघेल ले आज इहां ऊंखर निवास कार्यालय म पिछड़ा वर्ग के कई ठन संगठन मन ह सौजन्य मुलाकात करके राज्य म अन्य पिछड़ा वर्ग ल राष्ट्रीय मानक के रूप म 27 प्रतिशत आरक्षण करे म आभार व्यक्त करिन। ये बेरा म वन मंत्री श्री मोहम्मद अकबर, स्कूल शिक्षा मंत्री डॉ. प्रेमसाय सिंह टेकाम उपस्थित रहिन।
मुख्यमंत्री श्री भूपेश बघेल ह कहिन कि सरकार ह छत्तीसगढ़ के जनता के भलाई बर पाछू सात महिना म अनुसूचित जाति अऊ आन पिछड़ा वर्ग के आरक्षण के सीमा बढ़ाए के संगेच बहुत अकन जनकल्याणकारी फैसला लेहे हे। चाहे वो किसान मन ले 25 सौ रूपिया प्रति क्विंटल म धान के खरीदी, किसान मन के अल्प कालीन कृषि ऋण के माफी, 400 यूनिट तक बिजली बिल आधा या फेर तेदूपत्ता संग्रहण के दर 4 हजार रूपिया प्रति मानक बोरा करना। ए सबो फैसला के सबो वर्गो ल लाभ मिले हे। श्री बघेल ह कहिन कि सरकार के ए फैसला मन ले न केवल मनखे मन के क्रय शक्ति बाढ़े हे भलुक ऊंखर जीवन म बदलाव घलोक आये हे।
मुख्यमंत्री श्री बघेल ह मनखे मन ल राज्य सरकार के महत्वाकांक्षी सुराजी गांव योजना के तहत गांव-गांव म बनाए जात गौठान, चारागाह, किसान मन के इहां बाड़ी अऊ मृत होए नरवा मन के पुनर्जीवन के संबंध म विस्तार ले जानकारी दीन। उमन कहिन कि छत्तीसगढ़ के ये योजना के आज देश-दुनिया म चर्चा होवत हे, सबो के सहयोग ले सुराजी गांव योजना सफल होही अऊ ग्रामीण अजीविका के संवर्धन म मील के पत्थर साबित होही।
ये बेरा म सर्वश्री कृष्ण कुमार यादव, पूर्व सांसद रामाधार कश्यप, पूर्व विधायक सियाराम कौशिक संग बड़ संख्या म पिछड़ा वर्ग संगठन मन के पदाधिकारी उपस्थित रहिन।
