मुख्यमंत्री श्री विष्णु देव साय ह जय श्री राम के उद्घोष के संग राम रथ ल झंडी देखा के करिन रवाना

रायपुर, 19 जनवरी 2024। मुख्यमंत्री श्री विष्णु देव साय ह आज राज्य अतिथि गृह पहुना ले राम रथ ल झंडी देखा के रवाना करिन। ए बेरा म उप मुख्यमंत्री श्री विजय शर्मा घलोक उपस्थित रहिन। मुख्यमंत्री श्री साय अउ उप मुख्यमंत्री श्री शर्मा ह चिट्ठी म मनोकामना के रूप म ‘जय श्री राम’ लिखके रथ के जरिये अयोध्या श्री राम लला तीर भेजिन अऊ प्रदेशवासी मन के खुशहाल अउ सुखमय जीवन के कामना करीन। मुख्यमंत्री के संग रायपुर कान्वेंट स्कूल के छात्रा मन ह घलोक अपन संदेश ड्राप बॉक्स म डालीन। कार्यक्रम स्थल म छत्तीसगढ़ी फिल्म के डायरेक्टर श्री मनोज राजपूत, डॉ. ओम माखीजा अऊ श्री प्रेम देवांगन घलोक उपस्थित रहिन।
जानबा हे कि 94.3 माय एफ एम रेडियो चैनल के संग ‘एक चिट्ठी सियाराम के नाम’ अभियान चलाए जात हे। जेखर तहत राम रथ राज्य भर म भ्रमण कर प्रदेशवासी मन ले उंखर मनोकामना बर लिखित संदेश चिट्ठी के रूप म सकेलत हे। राम रथ प्रदेश भर ले सकलाए संदेश मनोकामना पूर्ति बर भगवान श्री राम तीर अयोध्या पहुँचही अऊ श्रद्धालु मन बर आशीर्वाद के रूप म अयोध्या ले मिट्टी अऊ प्रसाद लेके वापस लहुटही।