मुख्यमंत्री ह नेशनल लेवल के खिलाड़ी मन ले मुलाकात करिन

जगदलपुर, मुख्यमंत्री श्री भूपेश बघेल ह आज क्रीडा परिसर म निर्माणाधीन काम मन के अवलोकन के समय बस्तर के नेशनल लेवल के खिलाड़ी मन ले मुलाकात करिन अऊ ऊंखर उज्जवल भविष्य बर ओ मन ल शुभकामना दीन। मुख्यमंत्री ह क्रीड़ा परिसर के अवलोकन के समय तीरंदाजी म 4 पइत राष्ट्रीय स्तर म अपन प्रतिभा के प्रदर्शन करइया कुमारी राधिका पोयाम ले मुलाकात करिन। कुमारी राधिका ह सब जूनियर तीरंदाजी राष्ट्रीय प्रतियोगिता म स्वर्ण पदक जीते रहिन।
मुख्यमंत्री श्री बघेल ह अवलोकन के समय बस्तर जिला के दंतेश्वरी वार्ड म रहवइया 13 साल के युवराज सिंह ले घलोक मुलाकात करिन। युवराज म्यू थाई बाक्सिंग म पाछू पांच बछर ले लगातार राष्ट्रीय स्तर म छत्तीसगढ़ के प्रतिनिधित्व करत हे। आठवीं कक्षा म पढ़इया युवराज के लक्ष्य अंतर्राष्ट्रीय स्तर म म्यू थाई बाक्सिंग म छत्तीसगढ़ के नाम ल रोशन करे के हे। मुख्यमंत्री ह श्री युवराज ल ऊंखर उज्ज्वल भविष्य के शुभकामना दीन।