रायपुर, छत्तीसगढ़ के राजधानी रायपुर के साईंस कॉलेज मैदान म आयोजित राष्ट्रीय आदिवासी नृत्य महोत्सव म देश-विदेश के कलाकार पहुंचे हे। कलाकार मन म भारी उत्साह देखे जात हे। आज भिनसरहा साईंस कॉलेज मैदान पहुंचे कलाकार मन ह मंच म पहुंचे ले पहिली मैदान म अपन रिहर्सल करिस। कलाकार मन ह बताइन के छत्तीसगढ़ आके ओ मन रोमांचित अउ उत्साहित हें। इहां ओ मन ल अपन कला ल प्रदर्शित करे बर शानदार मंच मिले हे। देश के आखरी छोर केन्द्र शासित प्रदेश लक्षद्वीप ले आए कलाकार मुमताज ह बताइस के हमर टीम म 20 कलाकार हे। काली संझा हमन रायपुर पहुंचे हन। इहां हमन ल सबो प्रकार के सुविधा छत्तीसगढ़ शासन ह मुहैय्या कराए हे। इहां हमन ल कोनो प्रकार के तकलीफ नइ हे। हम पहिली पईत राष्ट्रीय आदिवासी नृत्य महोत्सव प्रतियोगिता म भाग लेवत हन। हम रोमांचित अऊ उत्साहित हन। हमार कोति ले बंदिया लोक नृत्य के प्रस्तुति करे जाही। अइसनहे हरियाणा के केथल शहर ले आए मुस्कान शामी अउ कृष्ण कुमार शर्मा ह बताइस कि हमन हरियाणवी लोकनृत्य के प्रस्तुति देहे जाही। हम काली मंझनिया रायपुर पहुंचे हन। प्रशासन कोति ले इहां बेहतर व्यवस्था करे गए हे।
इहां पुलिस प्रशासन के व्यवस्था ल कलाकार मन ह सहराइन अऊ कलाकार मन के रूके-खाए के व्यवस्था के तारीफ करिन। अइसनहे पुडुचेरी ले आए कलाकार मुरगन ह कहिस के हम पहिली पईत ये राष्ट्रीय नृत्य महोत्सव म संघर के उत्साहित हन। इहां के सबो व्यवस्था एक नम्बर हे। हमला कोनो प्रकार के तकलीफ नइ हे। छत्तीसगढ़ राज्य महिला आयोग के अध्यक्ष किरणमयी नायक ह भाग लेवईया मन ले मुलाकात करके कलाकार मन के हाल जानिन। ये बेरा म उमन लक्षद्वीप, पुडुचेरी के कलाकार मन के संग खुद रू-ब-रू होके ऊंखर संग फोटो सेल्फी लेत उंखर संस्कृति के बारे म जानकारी प्राप्त करिन। भाग लेवइया कलाकार मन ह उत्साह ले ओ मन ल बताइन के हम इहां आके रोमांचित हन अऊ अपन आप ल गौरावान्वित महसूस करत हन। उमन कहिन के अइसन कार्यक्रम देशभर म होना चाही।
राष्ट्रीय आदिवासी लोक नृत्य महोत्सव म कलाकार मन म उत्साह चरम म
