मरकज ले संबंधित सबो 107 मनखे मन के सेम्पल लेके जांच करे जात हे, मरकज म गए कोनो मनखे मिसिंग नइ हे
मुख्यमंत्री ह वीडियो काॅन्प्रेसिंग के माध्यम ले राज्य के पत्रकार मन ले करिन चर्चा
रायपुर, 10 अपरेल 2020। मुख्यमंत्री श्री भूपेश बघेल ह कहिन के लाॅकडाउन उठाए के निर्णय पूरा संवेदनशीलता अऊ सावधानी के संग ले जाही। उमन कहिन के लाॅकडाउन उठाए के निर्णय करत बेरा हमला जीवन अऊ जीविका के बीच संतुलन रखना होही। मुख्यमंत्री ह ये बात आज पत्रकार मन ले वीडियो कांन्फ्रेसिंग के माध्यम ले चर्चा के समय कहिन। ए चर्चा म रायपुर, बस्तर, सरगुजा, बिलासपुर, दुर्ग संभाग के करीबन 55 प्रतिनिधि मन ह भाग लीन।
मुख्यमंत्री ह कहिन के हमला अपन दिमाग म ले सोशल डिस्टेन्सिग जइसन शब्द के जगा फिजिकल डिस्टेन्सिंग ल लाना होही। ये बदलाव वो सामाजिक दूरी जेकर प्रभाव पलायन ले लहुटे, काम म वापिस आए मजदूर, पिछड़े तबका के मनखे मन के ऊपर परे के संभावना हे। मुख्यमंत्री ह कहिन कि प्रशासन प्रेरित लाॅकडाउन ले आगू बढ़के गाँव के जनता ह स्व प्रेरित अनुशासन के लाकडाउन के सफल प्रयोग करे हें, जेखर बर ओ मन बधाई के पात्र हें।
एक सवाल के जवाब म मुख्यमंत्री श्री भूपेश बघेल ह कहिन के निजामुददीन मरकज ले छत्तीसगढ़ लहुटे तबलीगी जमात के मनखे मन म कोनो मिसिंग नइ हे। उहां ले 107 मनखे वापस आए रहिन। उंखर मनके पहिचान कर लेहे गए हे। ओ मन ल क्वारेंटाइन म रखे गए हे अउ ऊंखर सेम्पल ले लेहे गे हे। ओ मन जिंकर सम्पर्क म आए रहिन वोकर ट्रेवल हिस्ट्री निकाले जात हे। उमन कहिन कि आन्ध्रप्रदेश के एसआईबी ह मोबाईल टावर के डाटा के आधार म 159 मनखे मन के सूची जारी करे रहिस, जऊन सही नइ रहिस। ये मां ले कुछ अइसन मनखे मन के नाम घलोक सामिल रहिस, जऊन केवल उँहा ले गुजरे रहिन अऊ ऊंखर नाम दर्ज हो गे रहिस। ये मन मरकज म नइ गे रहिन। बाद म भारत सरकार ले मरकज म गे मनखे मन के जानकारी लेहे गीस, जेमा 107 मनखे ही सामिल रहिन।
मुख्यमंत्री ह मीडिया प्रतिनिधि मन के सवाल मन के जवाब म बताइन के प्रदेश म एम्स रायपुर अऊ जगदलपुर के मेडिकल काॅलेज म कोरोना वायरस के टेस्टिंग के व्यवस्था हे। अभी राजधानी रायपुर के मेकाहारा अस्पताल म टेस्टिंग के अनुमति मिले हे। हमार पास क्वारेंटाइन के व्यवस्था अऊ पर्याप्त मात्रा म वेन्टिलेटर हे। राज्य सरकार टेस्टिंग किट बर टेंडर कर देहे हे। जल्दिच किट घलोक उपलब्ध हो जाही।
उमन ये घलोक बताइन के राशन, सब्जी, दवाई, खाद-बीज आदि जरूरी सेवा मन ल छूट देहे गए हे। कटघोरा म नवा केस मिले के बाद कटघोरा म 100 प्रतिशत लाॅकडाउन करे गए हे। उहां सबो मनखे मन के जांच करे जात हे। कटघोरा म शत-प्रतिशत मनखे मन के टेस्टिंग करे जाही। राज्य म कोरोना प्रभावित संक्रमण प्रभावित 18 मनखे म ले 09 स्वस्थ्य होके घर लहुट गे हे।
मुख्यमंत्री ह कहिन के कोरोना संक्रमण चीन ले पूरा दुनिया म फैले हे। कहूँ इन्टरनेशनल फ्लाईट ले अवइया मनखे मन ल उन्हें क्वारेंटाइन कर देहे जातिस अऊ उन्हें उंखर जांच करे जातीस, त संक्रमण नइ फैलतिस। उमन बताइन के राज्य के सीमा सील कर दे गए हे। राज्य के भीतर लाॅकडाउन म एकदमे जरूरी सेवा मन बर छूट दे गए हे। बाहिर ले आवागमन नइ होए के सेती संक्रमण ले बचे हवन। उमन बताइन के दू महिना के राशन वितरित करे जात हे। अनुसूचित क्षेत्र म महुआ अऊ इमली के खरीदी वन समिति अऊ स्व-सहायता समूह के माध्यम ले समर्थन मूल्य म करे जात हे।
छत्तीसगढ़ के जऊन मजदूर दूसर राज्य मन म फंसे हे, उंखर सहायता बर नोडल अधिकारी नियुक्त करे गए हे अऊ हेल्पलाईन नम्बर जारी करे गए हे। ए मजदूर मन बर उन्हें जरूरी व्यवस्था कराए जात हे।
स्वास्थ्य विभाग ल कोरोना संक्रमण के रेंडम जांच के निर्देश घलोक देहे गए हे। मुख्यमंत्री ह कहिन कि कल प्रधानमंत्री के वीडियो कांन्फ्रेंस के बाद 12 अपरेल के राज्य मंत्रीपरिषद के बैठक म चर्चा करके लाॅकडाउन के बारे म निर्णय ले जाही। उमन बताइन के प्रदेश म चना, गेहूं के फसल ल असमय ओलावृष्टि ले काफी नुकसान होय हे। अभी गेहूं के कटाई चलत हे। गर्मी के धान घलोक किसान लेवत हे। उमन बताइन के प्रदेश म मनरेगा म पांच लाख मजदूर काम करत हे।
