संगत, श्रवण अऊ विचार ही मानव ल उन्नति के कोति ले जाही : मंत्री श्री टंकराम वर्मा

रायपुर, 16 जनवरी 2024। राजस्व अउ आपदा प्रबंधन अऊ खेलकूद अउ युवा कल्याण मंत्री श्री टंकराम वर्मा ह आज आरंग विकासखंड के ग्राम भैंसा के सरस्वती शिशु मंदिर के पूर्व माध्यमिक शाला म सांसद निधि ले बने अकतहा कक्ष के उद्घाटन करिन। ये बेरा म उमन कहिन कि सरस्वती शिशु मंदिर शिक्षा के संग संस्कार के एक प्रमुख केंद्र हे। सरस्वती शिशु मंदिर विद्या प्राप्ति के अइसन केंद्र हे, जेकर साख कहीं अऊ देखे ल नइ मिलय। इहां जऊन संस्कार, मर्यादा अऊ अनुशासन हे, ये कहूं अऊ सीखे ल नइ मिलय। लइका मन ल प्रेरित करत उमन कहिन कि ओ मन अच्छा नागरिक अऊ चरित्रवान बनय। विचार हमार जीवन म बदलाव लाथे। हम जइसन सोचबो वइसनहे बनबो। विचार ल बड़का अऊ सकारात्मक रखव। श्री वर्मा ह ये बेरा म लइका मन ल प्रेरक कहानी घलोक सुनाइन। कहानी के असली केंद्र म विचार ल जिंदगी बदले म महत्वपूर्ण भूमिका निभाने वाला बताए गीस। जीवन ल सुखद बनाए बर विचार ल सकारात्मक रखे म बल दे गीस। विचार तभे अच्छा होही जब हम अच्छा बात सुनबो अऊ अच्छा मनखे मन ले मिलत रहिबो। संगत, श्रवण अऊ विचार ही विकास कोति ले के जाही। ये बेरा म उमन शाला परिसर म शेड निर्माण अऊ सांस्कृतिक कार्यक्रम बर 15 हज़ार रुपए के स्वीकृति के घोषणा करिन।