लोकसभा चुनई 2019 म अइसे कई ठो घटना घटिस जेकर खातिर छत्तीसगढ़ के राजनीतिक इतिहास म अब्बड़ दिन ले सुरता रखे जाही।
धमेन्द्र निर्मल के सार समाचार, लोकसभा चुनई 2019 म छत्तीसगढ़ के जम्मो 11 सीट बर तीनों चरण खातिर वोटिंग होगे। प्रदेश के जनता ह जम्मो 166 प्रत्याशी मन के राजनैतिक भविष्य ल इवीएम मशीन म धाँध डारे हे जेकर हाँका 23 मई के पर जाही। इही बीच लोकसभा चुनई 2019 के राजनैतिक यात्रा के गोठ करिन त छत्तीसगढ़ के लिहाज म ये चुनई ह कई ठो मायने म सुरता रखे जाही। 2019 के लोकसभा चुनई म अइसे कईठो घटना घटिस जेकर खातिर छत्तीसगढ़ के राजनीतिक इतिहास म अब्बड़ दिन ले सुरता रखे जाही।
; data-ad-client=”ca-pub-3208634751415787″ data-ad-slot=”6745940556″ data-ad-format=”auto”>
नियाव के नीव
कांग्रेस जेन नियाव (न्यूनतम आय योजना) के वचन देके जम्मा देश म चुनई लड़त हावे ओकरो नेहे ह छत्तीसेगढ़ म राखे गिस हे। कांग्रेस के राष्ट्रीय अध्यक्ष राहुल गांधी ह 28 जनवरी के छत्तीसगढ़ ले लोकसभा चुनई 2019 के प्रचार के हूँत पारिस हे। विधानसभा चुनई 2018 में मिले अल्लार जीत के पीछू छत्तीसगढ़ के राजधानी रइपुर के अटल नगर में आयोजित किसान आभार रैली में राहुल गांधी ह नियाव ल जनघोषणा पत्र म संघारे के संकेत दिए रिहिसे।
रइपुर म राहुल गांधी कहे रिहिन के 2019 म केंद्र म कांग्रेस के सरकार बनही त गरीब मन बर न्यूनतम आमदनी कानून लाए जाहीं। जेकर अनुसार हर गरीब के बैंक खाता म न्यूनतम आमदनी राशि डारे जाही।
आईना पॉलिटिक्स
छत्तीसगढ़ म लोकसभा चुनई 2019 के तियारी के बीच कांग्रेस ह प्रदेश म एक ठो अभियान चलाके मतदाता मन के धियान अपन कोति खींचे के उदीम करिन। मुखिया भूपेश बघेल ह पीएम नरेन्द्र मोदी ल भेंट म एक ठो आइना भेजिस अउ उघरा चिट्ठी लिखिन। जेमा उन मन पीएम मोदी ल ताना मारत लिखिन कि घेरी-धाँव आईना म देखौ अउ अपन असली थोथना ल पहिचाने के उदीम करौ। तेकर पीछू जम्मो कांग्रेस ह एला एक अभियान के रूप म ले लिस अउ भाजपा के अलग अलग नेता अउ पहिली के मंत्री मन ल आइना भेजे लगिन।
नक्सल हिंसा म भाजपा विधायक के हत्या
लोकसभा चुनई 2019 म पहिली चरण के वोटिंग के दू दिन पहिली नक्सली मन 9 अप्रैल के बस्तर संसदीय क्षेत्र के दंतेवाड़ा के नकुलनार मं भाजपा विधायक भीमा मंडावी के काफिला म हमला करके ओकर गाड़ी ल आईईडी ब्लास्ट करके उड़ा दिन। जेमा विधायक भीमा मंडावी अउ चार झिन पुलिस मन के मौत हो गईस।
सुने म आइस नवा नारा
छत्तीसगढ़ म विधानसभा चुनई 2018 के परिणाम आए के बादे ले 2019 के लोकसभा चुनई के तियारी शुरू होगे रिहिसे। इही बीच नवा नारा घलो सुने बर मिलिस। कांग्रेस पार्टी के राज्य सरकार ह जुन्ना सरकार ले जुड़े लोगन मन के मामला ल नवा मुहड़ा ले जांच शुरू करिस त भाजपा वाले मन बदलापुर के राजनीति के नारा दिन। जेकर पलटवार करत कांग्रेस बदलावपुर के राजनीति के नारा दे दिन।
नवा सरकार द्वारा धरा -रपटा स्थानांतरण ल लेके भाजपा ह कांग्रेस उपर स्थानांतरण उद्योग चलाए के नारा दे दिन। तेकर बाद एक ठो बयान म जब पूर्व सीएम डॉ. रमन सिंह ह भूपेश बघेल ल बात काहत छोटा आदमी कहि दिस त कांग्रेस ह ’मैं भी चैकीदार’ के देखा-सीखी सोशल मीडिया म अपन नाम के आगू ’’छोटा आदमी’’ लिखना शुरू कर दिन।
फेर अभी लोकतंत्र के महापर्व म प्रदेश के जनता ह अपना कर्तव्य ल पूरा करत 11 सीट मन बर 166 प्रत्याषी मन के किस्मत ल लिख के धर दे हावय। जेकर ऐलान 23 मई को हो जाही। जीत चाहे जेकर होवय फेर ये तो तय हे कि कई ठन मायने म लोकसभा चुनई 2019 ह प्रदेश के राजनीतिक इतिहास म अहम स्थान राखही।
चटकारा
दू गोल्लर कब के लड़े बर फुसन-फुसन के खुरचत रहय।
ओतके म किसान पीछू कोति ले आइस अउ जमेढ़ के एकक कोर्रा दूनो झिन ल लगाइस।
दूनो गोल्लर पल्ला भागिन अउ खेत के मेड़ म बइठे गुनत गोठियावत हे
-’’ गै यार ये सुखावत खेत अउ टेटकत किसान ल तो मुद्दा बनाएच नइ पाएन’’- अब का होही ?
