- दाऊ मंदरा जी फिल्म ल टैक्स मुक्त करे के घोषणा
- छत्तीसगढ़ म बनही फिल्म सिटी
- राज्य के नवा फिल्म नीति
के जल्दी बनही: मंत्री श्री अमरजीत भगत
रायपुर, संस्कृति मंत्री श्री अमरजीत भगत आज नवा रायपुर स्थित सत्य सांई हॉस्पिटल के सभागार म आयोजित स्मार्ट सिनेमा अवॉर्ड कार्यक्रम म सामिल होइन। श्री भगत ह कार्यक्रम म छत्तीसगढ़ी फिल्म निर्माता अऊ कलाकार मन ल अवॉर्ड देके सम्मानित करिन अऊ ओ मन ल शुभकामना अऊ बधाई दीन। मंत्री श्री भगत ह कार्यक्रम म छत्तीसगढ़ी फिल्म दाऊ मंदरा जी ल टैक्स मुक्त करे के घोषणा करिन। ये मौका म उमन कहिन कि छत्तीसगढ़ म छत्तीसगढ़ी फिल्म के विकास होही। इहां के संस्कृति ल आगू बढ़ाना हे अऊ राष्ट्रीय अऊ अंतर्राष्ट्रीय स्तर म पहिचान दिलाना हे। उमन कहिन कि छत्तीसगढ़ बर नवा फिल्म नीति बनाए बर पड़ोसी राज्य मन के फिल्म नीति मन के अध्ययन करके छत्तीसगढ़ बर अच्छा फिल्म नीति बनाय जाही। उमन बताइन कि ये संबंध म तीन पइत बैठक हो गे हे। मंत्री श्री भगत ह कहिन कि छत्तीसगढ़ी फिल्म बनाए म होवइया खरचा के 70 प्रतिशत राशि दीए जाय के संबंध म मसौदा तियार करे म घलोक विचार करे जात हे। उमन कहिन कि मुक्तांगन ले लेके जंगल सफारी तक छत्तीसगढ़ी फिल्म निर्माण बर बने जगा हो सकत हे। श्री भगत ह कहिन कि संस्कृति विभाग कोति ले आयोजित कार्यक्रम मन म सामिल कलाकार मन के मानदेय के भुगतान सरलग अऊ बिना देरी करे जाही। ये मौका म निर्देशक श्री संतोष जैन, श्री सतीश जैन, कलाकार श्री दिलीप षडंगी संग बड़ संख्या म फिल्म निर्माण ले जुड़े निर्माता-निर्देशक अऊ कलाकार मौजूद रहिन।
