रइपुर, 06 जुलाई 2021 मंगल। मुख्यमंत्री दाउ भूपेश बघेल ह कहीन कि छत्तीसगढ़ के वैभवशाली अउ पोठ संस्कृति के आनी—बानी के रंग रूप ल सहेजे बर डिजिटल लाईब्रेरी तियार करे जाय। एकर ले विश्व पटल म छत्तीसगढ़ के संस्कृति ल नवा पहिचान देहे म अउ भावी पीढ़ी अपन संस्कृति ले परिचित कराए म सहायता मिलही। मुख्यमंत्री ह आज अपन घरू कार्यालय म होवत संस्कृति विभाग के कामकाज के समीक्षा बइठका म ये निर्देश दीन।
छत्तीसगढ़ के अलग —अलग अंचल के लोक नृत्य, लोक कलाकार मन के संबंध म तको जानकारी सकेले जाना चाही । राज्य सरकार के लोक कलाकार प्रोत्साहन योजना संग संस्कृति विभाग के जम्मो योजना मन के माध्यम ले छत्तीसगढ़ के संस्कृति के संरक्षण, संवर्धन के बड़का बूता करइया अधिक से अधिक युवा कलाकार मन ल प्रोत्साहन देहे जाय। संस्कृति विभाग के सचिव श्री अन्बलगन पी.ह बैठका म जानकारी दीन कि लोक कलाकार प्रोत्साहन योजना, मानस मंडली प्रोत्साहन योजना, अर्थाभावग्रस्त होनहार कलाकार मन बर छात्रवृत्ति योजना प्रारंभ करे गे हवय। कलाकार मन के पंजीयन बर चिन्हारी पोर्टल तियार करे गे हवय। विभाग डाहर ले गरीबहा लेखक अउ कलाकार मन ल मासिक पेंशन देहे जावत हे । कलाकार कल्याण कोष (चिकित्सा अनुदान) ले गंभीर बीमारी, दुर्घटना, मउत म अधिकतम 25 हजार रूपिया के सहायता देहे जाथे । बछर 2020-21 म 131 प्रकरण म 14 लाख 76 हजार रूपिया के सहायता देहे गे हे। सांस्कृतिक कार्यक्रम प्रस्तुत करइया 1678 कलाकार दल मन ल 9 करोड़ 56 लाख रूपिया के मानदेय देहे गे हे।
मानस मंडली प्रोत्साहन योजना 2021 के तहत ग्राम पंचायत, ब्लॉक स्तर, जिला स्तर, राज्य स्तर म पंजीकृत रामायण मंडली मन के प्रतियोगिता आयोजित करके अव्वल अवइया रामायण मंडली मन ल प्रोत्साहन राशि देहे जाही।
संस्कृति विभाग के सचिव ह बताइन कि राजधानी रइपुर म स्वामी विवेकानंद के रइपुर प्रवास के सुरता ल सहेजे बर स्वामी विवेकानंद स्मारक भवन (डे-भवन) तियार करे जावत हे, जेमें स्वामी विवेकानंद के जीवनी, उन्कर आध्यात्मिक यात्रा, रइपुर प्रवास, विदेश प्रवास अउ भारतीय संस्कृति ऊपर उन्कर प्रभाव ल प्रदर्शित करे बर अलग-अलग गैलरी बनत हावय । नवा रइपुर के पुरखौती मुक्तांगन म छत्तीसगढ़ सांस्कृतिक स्पेस केन्द्र विकसित करे जाही, जेमें पुरखौती मुक्तांगन संग्रहालय परिसर म 10-10 एकड़ म भारत भवन, मानव संग्रहालय भवन, अभिलेखागार भवन बनाय जाही । राष्ट्रीय आदिवासी नृत्य समारोह 2021 के तियारी विभाग कोति ले प्रारंभ कर देहे गे हे । राज्य के सबो जिला मुख्यालय म छत्तीसगढ़ी कलेवा मन ल बढ़ावा देहे बर 15 अगस्त 2020 ले गढ़कलेवा के जलपान गृह प्रारंभ कर देहे गे हवय।